Historia

La Salle College ta existi oficialmente bou di e nomber La Salle College desde prome di september 1962. La Salle College su historia mes ta data hopi prome cu esey. Historia di e scol ta cuminsa alrededor di aña 1915 cu e apertura di St. Dominicus School cu Frater ( Frere) Constantius como cabesante di scol. A cuminsa e scol cu 115 alumno. Mayoria di e maestronan tabata Fraters (Van Tilburg). Apesar cu Conrado Coronel y Jean de Cuba a yuda masha hopi mes como e prome maestronan Arubano, Fraters Van Tilburg a keda traha na Aruba te na aña 1937 y na e momento ey ta Fraters de La Salle a tuma encargo di enseñansa di e mucha hombernan na Aruba. 

Na 1939 a parti St. Dominicus School den St. Dominicus College MULO (Meer Uitgebreid Lager Onderwijs) y La Salle School (Lager Onderwijs Basis). Na 1949 a sucede un otro cambio na St. Dominicus College unda cu e klasnan 1 te cu 6 a bira onderbouw y klasnan 7 te cu 10 a bira bovenbouw. Na 1962 a incorpora La Salle School den St. Dominicus Onderbouw y esaki a haci cu e scol a haya mas cu 1000 alumno. Na mes un momento St. Dominicus College bovenbouw a bira La Salle College cu despues a bira La Salle College Mavo. 

E nomber “La Salle” ta procedente di e Santo Catolico Jean Baptiste de La Salle naci na Francia na aña 1651 y a muri na 1719. Durante su bida Jean Baptiste de La Salle a dedica su bida na Dios como pastor, pero tambe a funda un Congregracion di “Broeders van Christelijke Scholen” y a dedica su tempo na formacion y educacion di e muchanan y yiunan di hende pober. Un di e logronan grandi di Jean Baptiste de La Salle e tempo ey tabata cu e idioma di duna les a cambia di Latin pa Frances. Na aña 1900 Jean Baptiste de La Salle a keda declara como un Santopa, e Papa di e tempo ey, y na 1950 Papa di Roma di e tempo ey a declara Jean Baptiste de La Salle como e protector y patrono di e maestronan.

Compila pa Roberto G. Croes

Nos Historia, Nos Herencia